Klinë, 1 Mars 2025
Kryeimami i xhamisë së Klinës, Hoxhë Blerim Musliu, ka njoftuar përmes një postimi në faqen e tij në Facebook se edhe këtë vit, gjatë gjithë muajit të shenjtë të Ramazanit, do të shpërndahen rreth 500 bukë falas çdo ditë për agjëruesit dhe familjet në nevojë.
Ky projekt humanitar, i cili tashmë është bërë një traditë, po realizohet për të shtatin vit radhazi. Synimi kryesor i kësaj nisme është të ndihmojë ata që kanë më shumë nevojë, duke ofruar ndihmë konkrete në formën e ushqimit bazë.
Sipas Hoxhë Musliut, ky aktivitet bëhet i mundur falë bujarisë dhe mbështetjes së madhe të komunitetit, i cili vazhdimisht kontribuon për të mirën e shoqërisë.
“Bamirësia dhe solidariteti janë vlera thelbësore të këtij muaji të bekuar. Siç thuhet:
‘Kush jep ushqim për një agjërues, do të ketë shpërblimin sikurse ai që ka agjëruar,’” – tha Hoxhë Musliu.
Ky projekt është një mundësi e shkëlqyer për të ndihmuar ata që kanë më pak dhe për të fituar shpërblime të shumta gjatë muajit të Ramazanit.
Buka mund të merret çdo ditë nga ora 15 tek furra “Beni LR” në Klinë.