Sekretari i Përgjithshëm i OKB-së, Antonio Guterres, tha se duhet bërë çdo përpjekje për të parandaluar rikthimin e luftimeve, gjë që do të ishte katastrofike.
Ai u bëri thirrje të gjitha palëve të ushtrojnë përmbajtje maksimale dhe të gjejnë një rrugë për fazën e ardhshme.
“Një armëpushim i përhershëm dhe lirimi i të gjithë pengjeve janë thelbësore për të parandaluar përshkallëzimin dhe për të shmangur pasoja edhe më shkatërruese për civilët,” thuhet në një deklaratë të lëshuar nga Stéphane Dujarric, zëdhënës i sekretarit të përgjithshëm.
“Ndërsa fillon Ramazani – një kohë paqeje dhe reflektimi – sekretari i përgjithshëm u bën thirrje të gjitha palëve të mos kursejnë asnjë përpjekje për t’i dhënë fund të gjitha akteve të dhunës. Kombet e Bashkuara janë të gatshme të mbështesin të gjitha përpjekjet e tilla.”
Guterres gjithashtu bëri thirrje për një de-përshkallëzim urgjent të dhunës në Bregun Perëndimor të pushtuar.