NJË DITË

PËR JU

Jam në mendime
të thella për ju,
për fatin tuaj,
si pe i këputur.

Një qiri po e ndez
për neve sot këtu,
ta kemi për të qarë
e për t´u lutur.

Unë ditën tuaj do
ta skalis në gur,
me shkronja
të arta,
me diell praruar.

Ta mbani si portret
të varur në mur,
në kalendarin
e jetës së jetuar.

Jam ulur vetëm
në një gur.
Rri mendoj për ju,
një nga një.

Për ëndrrat tuaja
me krahë pëllumbi.

Për ty që vrapoje
e s´vrapon dot më,
që atë ditë kur
të preu plumbi.

Një qiri e ndeza
edhe për ty,
për ty që u rrite
shtigjeve malore.

Një degë e tharë
ta mori njërin sy,
në valën e moshës
parashkollore.

S´më kujtohet dita,
s´më kujtohet viti,
kur ti si foshnjë u
ngrite më këmbë.

Ah, si të shtriu
polimieliti, dhe
nëna e mbajti
shpirtin
me dhëmbë.

Edhe për ty o shok,
malli më mori,
për përshëndetjen
tënde nga larg.

Ty dorën e njomë
ta ndrydhi traktori
dhe t´u ngrysën
vitet varg e varg.

Unë ditën tuaj do
ta skalis në gur,
me shkronja të arta,
me diell praruar.

Ta mbani si ikonë
të varur në mur,
në kalendarin
e jetës së jetuar.

[idemisai]