Qytetarët që do të gjenden jashtë vendit pas datës 12 shkurt dhe kanë dokumente të vjetra udhëtimi, do të mund të kthehen në vend me dokument që lëshohet në zyrat diplomatike-konsullore.
Kështu njoftoi sot ministri i Punëve të Jashtme Bujar Osmani, në takim me gazetarët. Ai tha se nuk ka vend për panik te qytetarët, duke shtuar se fluksi më i madh i kërkesave për dokumente udhëtimi është në Gjermani.“Janë edhe dy stacione të reja mobile për lëshimin e dokumenteve të udhëtimit. Numri më i madh është në Bon, ku janë lëshuar mbi 6000 dokumente udhëtimi. Pastaj në Bern, Berlin, Mynih, Venecia, Romë dhe Lubjanë”, tha Osmani.
Osmani tha se në vendet ku nuk kemi Përfaqësi diplomatike-konsullore, pra në Afrikë, janë duke punuar në e-konsullatë dhe dokumentet e udhëtimit do të dërgohen me postë.Ndryshe, më 12 shkurt skadon periudha e tranzicionit e Marrëveshjes së Prespës, gjegjësisht deri kur mund të përdoren dokumentet me emrin e vjetër të Maqedonisë së Veriut.