Në Maqedoninë e Veriut gjatë kësaj vere është regjistruar rritje e numrit të turistëve krahasuar me periudhën e njëjtë të vitit paraprak, transmeton Portalb.mk.
Nga gjithsej 102 061 turistë të huaj gjatë muajit gusht, më së shumti ka pasur nga Turqia (31 808), Serbia (9126), Holanda (5723), Rumania (5382), Polonia (5329), Gjermania (4 142), etj.
Turistët e huaj më së shumti kanë preferuar të qëndrojnë në Shkup (36 888), vendet me liqen (44 055), vendet malore (2 071), vendet me banja (652), etj.
Në bazë të akomodimit, 47 046 turistë të huaj janë akomoduar në hotele me katër yje, 28 098 në hotele me pesë yje, 2 397 në bujtina.
“Në periudhën janar – gusht 2023, krahasuar me të njëjtën periudhë të vitit paraprak, numri i turistëve është rritur me 22.0 %, edhe atë: te turistët vendor ka rritje prej 0.4 %, ndërsa te turistët e huaj ka rritje prej 42.4 %”, raportoi Enti Shtetëror i Statistikave.
Ndryshe, në Maqedoninë e Veriut është regjistruar rritje e çmimeve edhe në sektorin e hotelerisë, krahasuar me periudhën e njëjtë të vitit paraprak. Çmimet janë rritur për 11.1 përqind në krahasim me periudhën janar-shtator të vitit të kaluar. Në krahasim me shtatorin e kaluar, rritje më e theksuar është regjistruar te gjellrat (30.2 %), ndërsa ulje nuk është regjistruar në asnjë produkt.