Zëvendëskryeministri i Qeverisë së Republikës së Maqedonisë së Veriut, përgjegjës për çështje ekonomike, koordinim me resorët ekonomikë dhe investimet, Fatmir Bytyqi, ishte i ftuar në emisionin debativ “Klan Debat” në TV Klan, ku iu përgjigj temave aktuale të ekonomisë.
Zëvendëskryeministri Bytyqi iu referua vendimit të fundit për rritjen e pagës minimale në 20.175 denarë, për çka tha se për herë të parë në Këshillin Ekonomiko-Social nuk ka pasur negociata dhe shantazhe, sepse zgjidhja rrjedh nga metodologjia e re që e miratuam vitin e kaluar për rritjen e pagës minimale në nivel vjetor.
“Në sektorin publik, Qeveria do të vendosë se çfarë do të bëhet me pagat e tjera. Të gjithë nëpunësit administrativë, 27 mijë sosh, do të kenë rritje lineare të barabartë me rritjen e pagës minimale. Këtu përfshihen punonjësit e sektorit të shërbimeve sociale, si dhe punonjësit e sektorit të kulturës, të cilët janë rreth tre mijë. Të gjithë sektorët tjerë që nuk kanë respektuar ligjet e pagave do të duhet të respektojnë disa ligje në periudhën e ardhshme. Për këtë arsye ne i kemi thirrur sindikatat në mbledhje javën e ardhshme për marrëveshjen kolektive në sektorin publik, ndërsa në sektorin privat i takon punëdhënësve ta bëjnë këtë”.
Zëvendëskryeministri Bytyqi, i ftuar në Klan Debat, foli edhe për masat që po i ndërmerr Qeveria për përballimin e krizës ekonomike. Sipas tij, nga kjo javë do të hyjnë në fuqi edhe masat tjera, përveç asaj për ngrirjen e çmimit të bukës si pasojë e sjelljes joetike të operatorëve ekonomikë.
“Në tetor të vitit të kaluar, pas diskutimeve me prodhuesit e ushqimit, miratuam një masë për subvencionimin e energjisë elektrike që do të parandalojë rritjen e çmimeve, por kjo marrëveshje nuk është respektuar. Prandaj tani kemi masën e ngrirjes së çmimeve që do të jetë e vlefshme edhe në periudhën kur kompanitë nuk do të përdorin energjinë elektrike të subvencionuar. Derisa të stabilizohet çmimi i produkteve në treg do të vazhdojmë me masën e ngrirjes së çmimeve, sepse është koha që çdo pjesëmarrës në jetën shoqërore të sillet moralisht”, tha Bytyqi, i cili informoi se nga 16 marsi do të bëhet ngrirja e çmimit të produkteve të qumështit dhe makaronat, por edhe se po bëhen analiza për ngrirjen e mundshme të çmimeve të disa produkteve të tjera ushqimore bazë.
Në këtë emision debatues në TV Klan, zëvendëskryeministri Bytyqi foli edhe për ndërtimin e korridoreve 8 dhe 10d dhe përfitimet e tyre, për importin e fuqisë punëtore, për ndryshimet kushtetuese dhe për “One-stop shop”-in edhe në kufirin me Shqipërinë, për të cilin tha se do të jetë gati këtë verë.