Protestat kundër masave të rrepta kufizuese për të parandaluar përhapjen e Covid-19 shpërthyen mëngjesin e sotëm në disa qytete kineze, përfshirë qendrën financiare të Shangait, gati tre vjet nga fillimi i pandemisë, raportojnë mediat e huaja .
Një valë e re pakënaqësie u ndez nga një zjarr në një ndërtesë në kryeqytetin rajonal të Xinjiang, Urumqi të enjten që vrau dhjetë njerëz. Zemërimi i publikut u ndez nga dyshimet, të cilat filluan të përhapen në mesin e përdoruesve të internetit, se banorët e ndërtesës nuk arritën të shpëtonin në kohë për shkak se ndërtesa ishte pjesërisht e bllokuar, gjë që zyrtarët e qytetit e mohuan me forcë.
Policia tentoi disa herë të shpërndante turmën, ndërsa në videon e publikuar shihet turma që i thërret policisë “I shërbejmë popullit”, “Nuk duam kode shëndetësore” dhe “Duam lirinë”.
Banorët e Shangait, qyteti më i populluar dhe qendra financiare e Kinës, u mblodhën për një vigjilje që u kthye në një protestë herët në mëngjes.
Demonstruesit e mbledhur, siç raportojnë agjencitë botërore, mbanin në duar fletë të zbrazëta, simbol i protestuesve kundër censurës. Pas kësaj, sipas një video të postuar në rrjetet sociale, ata filluan të bërtisnin: “Hiqni bllokadën në Urumqi, hiqni bllokadën në Xinjiang, hiqni bllokadën në të gjithë Kinën!” Disa, nga ana tjetër, filluan të bërtasin:
“Poshtë Partia Komuniste Kineze, poshtë Xi Jinping, liri për Urumqin!”