Prof. Bexhet Asani dhuroi 2 libra për Bibliotekën Shkencore të Vatrës
Prof. Bexhet Asani dhuroi 2 libra për Bibliotekën Shkencore të Vatrës. Libri “Ëmbëlsia e gjuhës amë” kryesisht përfshinë studime, recensione, kumtime, gjuhë, skica si dhe portrete për punonjësit e dalluar në fushë të arsimit e të kulturës në ultësirën e Strugës. Vepra “Ëmbëlsia e gjuhës amë” është e ndarë në gjashtë kapituj. Libri ka 274 faqe. Në libër janë përfshirë studimet për Gjergj Kastriotin Skënderbeun, me rastin e “Vitit të Skënderbeut 2018”, si dhe kumtesa nga Konferenca shkencore që u mbajt me këtë rast në Nju Xherzi. Vlen të përmend kumtesat si: “Gjuha e Skënderbeut apo arbërishtja një raritet kulturor”, Poema e Binard Bilotës “Shpata Skanderbekut ndë Dibrë Poshtë”, “Një këngë popullore për Skënderbeun nga Malësia e Sharrit”, pastaj recensionet që u kushtohen veprave letrare dhe shkencore të autorëve arbëreshë qofshin ata të rilindjes qofshin ata shkrimtarë bashkëkohorë apo Grupe Artistike e Folklorike Arbëreshe si: “Një libër me vlera nga Mbuzati”, Grupi “Biltë e Firmozës” në mbrojtje të trashëgimisë kulturore arbëreshe”, “Me arbëreshët e Zarës”, “Një ringjallje te arbëreshët e Ukrainës”etj. Janë prfshirë edhe studime nga veprimtaria e shqiptarëve në Nju Xherzi si: “Disa fletushka të Fondit të Përbashkët Shqiptar” në Nju Xherzi. Ky studim ka të bëjë me fletushkën “Tribuna” e Fondit të Përbashkët Shqiptar sot Qendra Kulturore Shqiptaro – Amerikane në Riverdell të Nju Xherzit. Fletushka “Tribuna” arriti të botohet gjer te numri 24 dhe pastaj u shua. Megjithatë në këto pak numra shtjellohet tërë veprimtaria e Fondit të Përbashkët që nga themelimi në vitin 1977 derin në vitin 2012 kur dhe doli numri i fundit me rastin e 100 vjetorit të Shpalljes së Pavarësisë së Republikës së Shqipërisë.
Profesor Kristaq Shabani redaktor i librit “Ëmbëlsia e gjuhës amë” të dr. Bexhet Asanit shkruan: “Kështu mund të përmendim punimet: “GJUHA E SKËNDERBEUT APO ARBËRISHTJA NJË RARITET KULTUROR”, ku shprehet: “Arbërishtja arkaike, apo siç mund ta quajmë edhe gjuha e Skënderbeut, flitet sot e kësaj dite, në disa vende të botës. Arbërishtja flitet në krahinat Jugut të Italisë, në Kalabri e në Sicili. Arbërishtja arkaike, apo siç mund ta quajmë edhe gjuha e Skënderbeut, flitet sot e kësaj dite, në disa vende të botës”. Studiuesi Asani i mëshon fort qenësisë së sotme të saj ekzistenciale dhe dhe shndërrimin e saj në ranitet kulturor, duke sjellë shkaqet dhe arsyet e një gjendje të tillë. Të plotformuara dhe mbushamendëse janë paraqitja e disa fjalëve, frazeologjive, shprehje e fjalë të urta nga disa katunde arbëreshe, disa prej të cilave i ruan shqipja e sotme e disa nuk i ruan. Duke hyrë në këtë “arsenal” ndeshesh me gjallinë e ruajtjes dhe të përcjelljes së gjuhës arbërishte, me të cilat studiuesit, intelektualët nisen me rrallësinë dhe prezencën. Studiuesi shtron në tryezën e arsyes shkencore detyrën imediate për ruajtjen e kësaj pasurie. Ndaj, në këtë kontekst evidentues, është një detyrë historike, e cila realizon dhe njohjen dhe ruajtjen e traditës së gjuhës së folur dhe të shkruar. Përkushtimi i studiuesit, Dr. Bexhet Asani, shpaloset qartësisht dhe këtu vërehet dhe “pastërtia” e tij shkencore e motivuar”.
Se çfarë përmban më tej libri me titullin simpatik “Ëmbëlsia e gjuhës amë” le ta zbulojë vetë lexuesi.
Libri studimor në gjuhën anglishte është “Albanian Folk in North Macedonia” (Lirika popullore shqiptare në Maqedoni), siç shihet edhe nga titulli ka të bëj me këngët popullore lirike të shqiptarëve në Maqedoni. Librin në fjalë pas shumë peripecish arriti që ta botojë edhe në gjuhën angleze. Libri i ka 315 faqe. Studimi “Albanian Folk in North Macedonia” (Lirika popullore shqiptare në Maqedoni), është i ndarë në pesë kapituj. Është studim i parë që është bërë për lirikën popullore shqiptare në Maqedoninë e Veriut, prandaj është me interes për shkencat albanologjike në veçanti dhe për studiuesit dhe lexuesit e huaj në përgjithësi. Studiuesit e folklorit dr. Rrustem Berisha dhe dr. Sadri Fetiu, kur bëjnë fjalë për këtë studim monografik midis tjerash shkruajnë: “Studimi ka një hyrje relativisht të gjatë në të cilën janë paraqitur në vija të përgjithshme veçoritë e lirikës shqipe në Maqedoni, duke i vënë në spikamë karakteristikat dalluese të krijimeve të këtij regjioni, ku hulumtimet folklorike në terren kanë filluar shumë më vonë se në viset e tjera shqiptare. Shikuar përgjithësisht lirizmi i kësaj poezie, siç konstaton prof. Bexhet Asani kushtëzohet edhe nga mënyra e të kënduarit, ku janë ruajtur përbërës të hershëm të diafonisë dhe polifonisë shqiptare. Me gjithë karakteristikat e veçanta që në hyrje autori konstaton se lirika populllore shqiptare në Maqedoni është pjesë e pandashme e krijimtarisë popullore të kombit tonë. Në hyrje të këtij studimi, krahas paraqitjes së qëllimit për të cilin bëhet fjalë janë trajtuar shkurtimisht edhe aspektet teorike dhe metodologjike që janë zbatuar për hartimin e tij. Këtu, autori na jep edhe një pasqyrë të tërësishme të lëndës që përfshihet në kapitujt dhe nënkapitujt e këtij studimi”.
