Pavarësisht dallimeve midis vendeve për pushtimin e Ukrainës, presioni ndaj Rusisë u rrit edhe më shumë në samitin e G20 për t’i dhënë fund luftës.
Takimi më i rëndësishëm ndërkombëtar i liderëve që nga fillimi i pandemisë po zhvillohet pa Vladimir Putinin në Bali gati nëntë muaj nga fillimi i luftës së përgjakshme që ka nxitur një krizë globale të energjisë dhe ushqimit.
Samiti ka ekspozuar gjithashtu dallimet midis perëndimorëve që mbështesin Ukrainën dhe vendeve të tjera, të udhëhequr nga Kina, të cilët kanë shmangur dënimin e Moskës.
Pavarësisht kësaj, anëtarët e klubit ranë dakord për një draft komunikatë të përbashkët, diçka që ishte parë pothuajse e pamundur ditët e fundit për shkak të përçarjes midis vendeve dhe nevojës për miratimin e Moskës.
Drafti, nëse miratohet nga udhëheqësit, do të njohë efektet negative të “luftës në Ukrainë” dhe përdor termin “luftë” të refuzuar nga Moska, i cili edhe pas nëntë muajsh i referohet një “operacioni ushtarak special”.
Në të thuhet se “shumica e anëtarëve”, “dënon fuqishëm” konfliktin, e konsideron “të papranueshëm” përdorimin e kërcënimit të armëve bërthamore dhe bën thirrje për rinovimin e marrëveshjes për eksportin e grurit përmes Detit të Zi.
Argjentina dhe Turqia, gjithashtu anëtare të G20, janë ndër vendet më të prekura nga këto kriza. Pas kthimit nga Khersoni, presidenti ukrainas Volodymyr Zelensky propozoi zgjatjen e marrëveshjes së eksportit të grurit nga e cila varen shumë vende të varfra.
Ministri i Jashtëm rus Sergei Lavrov, i cili përfaqësoi Putinin në Bali, i përshkroi si “joreale” kushtet e Ukrainës për fillimin e negociatave që synojnë përfundimin e luftës.
Të gjithë sytë janë te Kina, një fuqi e madhe, presidenti i së cilës, Xi Jinping, ka forcuar lidhjet me Vladimir Putinin në prag të luftës, duke formuar një front të përbashkët kundër asaj që Moska dhe Pekini e kanë përshkruar si “vullnet hegjemonist të Perëndimit”.