Hungaria do të marrë një dërgesë të parë të vaksinave të koronavirusit në dhjetor ose janar dhe do të jetë në gjendje të “deklarojë fitoren mbi pandeminë” deri në pranverën e ardhshme, tha sot Kryeministri Viktor Orban.
Orban tha se Hungaria po fliste me Kinën dhe Rusinë dhe mund të kishte akses në dy ose tre vaksina të ndryshme deri në fillim të vitit të ardhshëm, njoftoi Reuters. Deri më tani, nuk ka asnjë vaksinë të provuar klinikisht kundër koronavirusit.
Orbán tha në një intervistë në radio se kishte mjaft shtretër spitalorë dhe ventilator për të trajtuar pacientët me koronavirus dhe ai beson se “çelësi është t’i bindesh rregullave ekzistuese … dhe se maskat duhet të vishen”.
Sipas Reuters, të enjten numri i rasteve të koronavirusit në Hungari u rrit në 68,127, me 56 vdekje të reja – duke e çuar numrin e përgjithshëm të vdekjeve në 1,634 – dhe ka 3,197 pacientë COVID-19 në spitale.
Të martën, Dhoma Mjekësore Hungareze i bëri thirrje qeverisë të kufizojë kohën e hapjes së dyqaneve për të moshuarit dhe të forcojë rregullat ekzistuese për veshjen e maskave.
Hungaria ende nuk ka vendosur kufizime në ngjarjet masive, me shkolla, dyqane dhe ndeshje futbolli që funksionojnë normalisht në pjesën më të madhe të pandemisë.