𝔸 𝕚 𝕕𝕦𝕙𝕖𝕥 𝕊𝕥𝕣𝕦𝕘𝕖𝕤 𝕟𝕛𝕖 𝕜𝕒𝕟𝕕𝕚𝕕𝕒𝕥 𝕚 𝕡𝕒𝕧𝕒𝕣𝕦𝕣 𝕡𝕖𝕣 𝕥𝕖 𝕟𝕕𝕒𝕝𝕦𝕒𝕣 𝕫𝕙𝕧𝕒𝕥𝕛𝕖𝕟 𝕖 𝕢𝕪𝕥𝕖𝕥𝕚𝕥?

Struga, një qytet me potencial të jashtëzakonshëm natyror dhe kulturor, prej vitesh është bërë pre e një cikli të pandalshëm të keqqeverisjes nga militantë partiakë, të cilët shohin pushtetin si një burim pasurimi personal. Brenda kësaj skeme, komuna nuk trajtohet si një institucion për të mirën e qytetarëve, por si një arkë private nga e cila shpërndahen favore për klientelën politike, ndërsa qytetarët mbeten spektatorë të një loje të pandershme që zhvillohet në kurriz të tyre.

Por a është e mundur që ky cikël të ndalet? A mundet Struga të çlirohet nga kjo skllavëri politike që i ka mbytur shpresat për një zhvillim të ndershëm? E vetmja mënyrë për ta ndalur këtë trend është që qytetarët të mbështesin një kandidat të pavarur – dikë që nuk është i kapur nga partitë dhe që ka një vizion të pastër për të ardhmen e qytetit.

Një kandidat i pavarur nuk ka borxhe politike ndaj strukturave partiake dhe nuk është i detyruar të punësojë militantë, të japë tenderë të dyshimtë apo të mbyllë sytë përballë abuzimeve. Ai është një përfaqësues i interesave të qytetarëve dhe jo një marionetë e grupeve të interesit. Një Strugë e lirë nga kthetrat e politikës klienteliste është një Strugë që mund të ndërtojë rrugë cilësore, të investojë në arsim e shëndetësi, dhe të krijojë kushte për zhvillim ekonomik të qëndrueshëm.

Koha për një ndryshim të vërtetë

Nuk mund të presim më që partitë të reformohen nga brenda apo që ata që kanë përfituar nga ky sistem të heqin dorë vullnetarisht nga privilegjet e tyre. Ndryshimi mund të vijë vetëm nga qytetarët, të cilët duhet të çlirohen nga frika dhe iluzionet që u shiten në çdo cikël zgjedhor.

Nëse Struga do të mbetet peng e një klase politike që mendon vetëm për veten, atëherë qyteti do të vijojë të zbrazet, ndërsa pasuritë e tij do të bien në duart e pak njerëzve. Por nëse qytetarët zgjedhin një rrugë të re, të pavarur nga interesat e ngushta, atëherë ky qytet ka një shans për të lulëzuar.

Struga nuk ka nevojë për më shumë premtime boshe. Struga ka nevojë për guxim, ndershmëri dhe për njerëz që vërtetë e duan atë. A është koha për një kandidat të pavarur? Mbase kjo është pyetja më e rëndësishme që duhet bërë sot.