Punëtorët e huaj të kualifikuar përballen me nivele alarmante diskriminimi në Gjermani.
Sipas një sondazhi nga Instituti për Kërkime të Punësimit (IAB), afër 56 për qind e punëtorëve emigrantë të kualifikuar raportuan se përballen me paragjykime dhe diskriminim në të paktën një fushë të jetës. Strehimi dhe punësimi u shfaqën si sektorë veçanërisht problematikë për ta.
Studimi zbuloi se 40 për qind e të anketuarve ndiheshin të diskriminuar kur kërkonin strehim, ndërsa 21 për qind perceptonin disavantazhe në vendin e punës. Diskriminimi u raportua edhe në situata të përditshme si në transportin publik ose dyqane dhe restorante.
Rreth 20 për qind e profesionistëve emigrantë thanë se ndiheshin të pa favorizuar kur kishin të bëjnë me administratën publike ose autoritetet. Studimi gjithashtu zbuloi se 93 për qind e të anketuarve besonin se përkatësia e tyre etnike ishte arsyeja kryesore për diskriminimin me të cilin u përballën.
Ekspertët e institutit IAB paralajmëruan se këto përvoja mund të pengojnë ndjeshëm integrimin ekonomik dhe social të profesionistëve emigrantë të kualifikuar, duke i dekurajuar potencialisht ata që të zgjedhin Gjermaninë si një destinacion afatgjatë.
Gjermania, ekonomia më e madhe e BE-së, aktualisht po përballet me një popullsi në plakje dhe mungesë të konsiderueshme të punëtorëve të kualifikuar në sektorët e teknologjisë së informacionit, energjisë së rinovueshme, ndërtimit dhe mjekësisë.
Së fundmi, qeveria gjermane ka reformuar Aktin e Imigrimit të Aftësive (FEG) për të tërhequr më shumë specialistë dhe profesionistë të kualifikuar nga jashtë për të përmbushur nevojat e tregut të punës.