Sot gati 15.000 nxënës që do të mbarojnë arsimin e mesëm do t’i nënshtrohen provimit të parë nga dy provimet eksterne të maturës shtetërore – gjuhë amtare dhe letërsi. Sipas të dhënave të Qendrës Shtetërore të Provimeve (QSHP), organizator i maturës shtetërore, për provimin në gjuhë dhe letërsi maqedonase janë regjistruar 10.088 kandidatë, për gjuhë dhe letërsi shqipe 4.189 dhe për gjuhë dhe letërsi turke 315 kandidatë.
Me rastin e fillimit të maturës shtetërore në vitin shkollor 2023-2024, ministri i Arsimit dhe Shkencës Jeton Shaqiri, do të vizitojë shkollën e mesme “Niko Nestor” në Strugë. Drejtoresha e QSHP-së, Biljana Mihajlovska do ta vizitojë shkollën e mesme të Shkupit “Orce Nikollov”.
Provimi i dytë i jashtëm (zgjedhor) do të jetë më 8 qershor. Janë regjistruar 1356 kandidatë për matematikë, 13.198 për gjuhë angleze, 37 për gjuhë frënge, 114 për gjuhë gjermane, 84 për estetikë dhe nga një kandidat për gjuhë dhe filozofi ruse.
Sipas llojit të arsimit, 6341 maturantë janë të gjimnazeve, 8230 nga arsimi profesional dhe 263 nga arsimi artistik.
Këtë vit shkollor, në vend të klasave, maturantët do t’i nënshtrohen testeve në hapësira të mëdha të shkollave – korridore, salla sportive të shkollës ose në një hapësirë tjetër të madhe shkollore ku ka kushte për testim. Qëllimi është që të ketë më shumë testues në një vend për të mundësuar kontroll më të mirë gjatë provimit dhe për të parandaluar rishkrimin apo ndarjen masive të përgjigjeve, siç ndodhi vitin e kaluar në një grup në aplikacionin Viber në provimin e gjuhës angleze.
Testimi për dy provimet eksterne, sot dhe të shtunën e ardhshme, do të nisë në orën 10:00. Provimi do të mbikëqyret nga rreth 2000 testues – mësimdhënës të cilët janë të angazhuar në shkolla të tjera, jo në shkollat e tyre, si dhe rreth 200 vëzhgues nga QSHP, Byroja për Zhvillimin e Arsimit, Ministria e Arsimit dhe Shkencës dhe Qendra për Arsim dhe Trajnim Profesional.
Maturantët që nuk do të kalojnë maturën shtetërore në sesionin e qershorit ose jo të plotë, do të mund të regjistrohen në sesionin e gushtit kur do të jepen dy provimet eksterne në datat 12 dhe 14 gusht 2024.