Ministri i Ekonomisë, Kreshnik Bekteshi tha se sot do të realizojë takim me prodhuesit dhe distributorët e pijeve në shtet me të cilët do të diskutojë për përfshirjen e këtyre produkteve në vendimet për lirimin e produkteve të cilat i paralajmëroi Qeveria.
“Pres që të kemi ‘fidbek’ pozitiv edhe nga ana e tyre dhe me vendimin e ardhshëm, përveç produkteve kimike, të përfshihen edhe pijet në uljen e çmimeve deri më 30 nëntor”, tha Bekteshi në konferencën për media në Qeveri.
Në mbledhjen e Qeverisë nesër do të merret vendim me të cilin për minimum 10 për qind do të ulen çmimet e mbi 50 produkteve ushqimore bazë, prej të cilave 90 për qind me tatim prej 5 për qind, ndërsa çmimi i referimit do të jetë çmimi nga 1 gushti i këtij viti.
“Jam i bindur se nga e dita e mërkurë do të ketë ulje të dukshme të çmimeve të produkteve të cilat do të publikohen nesër pas mbledhjes së Qeverisë”, tha Bekteshi.
Produktet që do të kenë çmim të ulur do të shënohen me shenjën çmimi i garantuar.