Shkollat e mesme në vend që kanë drejtime të profesioneve shëndetësor nuk do të mund të regjistrojnë më nxënës me kohë të pjesshme, transmeton Portalb.mk.
Nga Ministria e Arsimit dhe Shkencës konfirmuan për MIA-në se këtyre shkollave është dërguar një shkresë me kërkesë që të pezullohet regjistrimi i nxënësve me kohë të pjesshme.
Deri më tani me korrespondencë mund të kryhej arsimi i mesëm për motër medicinale, teknikë farmaceutikë dhe profile të tjera nga profesioni shëndetësor.
Jozyrtarisht, më së shumti janë të interesuar kandidatët me arsim të mesëm të përfunduar, të cilët po rikualifikohen me synimin për të marrë diplomë në këto fusha dhe për të aplikuar për punë jashtë vendit.
MASh nuk saktëson arsyen e këtij vendimi, por thekson se i njëjti është marrë për të mbrojtur interesat kombëtare.
“MASh u ka dërguar shkresë të gjitha shkollave në të cilat zbatohet profesioni shëndetësor, se regjistrimi i nxënësve me korrespondencë është pezulluar. Vendimi është marrë në drejtim të mbrojtjes së interesave kombëtare, sipas analizës së gjendjes së tregut të punës”, thanë për MIA-n nga Ministria e Arsimit dhe Shkencës.