Fitore me meritë ndaj Skopjes
Struga Trim Lum ka regjistruar një fitore minimale 1:0, por me shumë meritë përballë Skopjes, ndeshje kjo e vlefshme për javën e 27-të në elitën e futbollit vendor. Duke pasur parasysh rëndësinë e pikëve, skuadra jonë që nga fillimi ishte e orientuar në sulm, mirëpo loja difenzive e skuadrës kundërshtare bënte që futbollistët tanë të vuajnë golin, i cili erdhi vetëm në pjesën e dytë, më saktësisht në minutën e 67-të. Pas një rivënie nga këndi të ekzekutuar nga Bunjamin Shabani, mbrojtësi Sava Radiç, kërceu më së larti në zonën kundërshtare dhe me kokë mposhti portierin Andreja Efremov. Ky gol solli shumë gëzim në mesin e futbollistëve tanë, të cilët vazhduan me tempon e njëjtë edhe pas këtij goli, që në fund u tregua edhe si vendimtarë për 3 pikët e reja. Struga Trim Lum pas 27 xhirove numëron 36 pikë, duke u renditur në pozitën e 8-të, ndërkohë kundërshtari ynë i sotëm, Skopje me 26 pikë vazhdon të mbaj pozitën e 9-të.