Asgjë spektakolare nuk ndodhi në Vevçan, për arsye politike ata donin një incident dhe sensacionalizëm, vlerësoi ministri i Punëve të Brendshme, Oliver Spasovski në lidhje me ndërhyrjen e policisë për shkak të mosrespektimit të masave të detyrueshme për mbrojtje kundër Kovid-19 në Karnavalin e Vevçanit.
Në një intervistë me servisin kombëtar MTV, Spasovski theksoi se marrëveshjet “e arritura me banorët e Vevçanit nuk u respektuan”.
Ministri apelon që masat të respektohen dhe kështu të ndihmojnë sistemin shëndetësor dhe punonjësit mjekësorë.
“Janari është plot me pushime dhe për këtë apelojmë që të ndërpriten grupimet dhe të respektohen vazhdimisht masat”, theksoi Spasovski.
Ndryshe, pardje, përkundër anulimeve të disa prej organizatorëve të karnavalit, qindra vasiliçarë nga Vevçani, nën maskat e karnavalit, u përpoqën të mbajnë paradën e karnavalit, pas së cilës policia ndërhyri. Disa njerëz nga Vevçani akuzuan se dikush dëshiron të shkatërrojë traditën shekullore të Vasilicës.