Biden: 100 milionë vaksina për SHBA-në në 100 ditët e para të presidencës time

Presidenti i zgjedhur amerikan Joe Biden ka vendosur një objektiv që të sigurojë 100 milionë vaksina kundër COVID-19 në 100 ditët e tij të para në detyrë.

Ai tha se ditët e tij të para prej kur do ta marrë presidencën nuk do ta ndalin përhapjen e koronavirusit, por mund ta ndryshojnë kursin e infeksionit dhe jetën e amerikanëve.“100 ditët e mia të para në zyrë nuk do t’i japin fund COVID-19.

Nuk mund ta premtoj këtë. Ne nuk u futëm në këtë rrëmujë shpejt dhe nuk do të dalim nga kjo shpejt. Por, në 100 ditë mund ta ndryshojmë kursin e infeksionit dhe jetën në Amerikë për të mirë”.

“Cilado qofshin politikat, ose bindjet tua, mbajeni maskën 100 ditë”, ka thënë Biden derisa e ka prezantuan ekipin e tij të mjekëve për kohën kur do ta marrë pozitën e Presidentit të SHBA-ve më 20 janar.

Gjatë të martës një raport hapi rrugën që vaksina e Pfizer/BioNTech të aprovohet dhe të nisë vaksinimi masiv për amerikanët.Ndërkohë, presidenti Donald Trump mori pjesë në një samit të programit të tij të vaksinimit për COVID-19 në Shtëpinë e Bardhë ku e përshëndeti miratimin e shumëpritur të vaksinave.

SHBA-ja ka regjistruar më shumë se 15 milionë raste dhe 285,000 vdekje nga COVID-19 që nga fillimi i pandemisë deri më tani, të dyja shifrat më të larta globale sipas Universitetit “Johns Hopkins”.